《迷離短篇》電影院門口見 | 最幸福的一刻 | 性感女老師 | 壞𨋢
前言：呢期係 IG 有新搞作，同大家互動玩下短篇搵返寫作手感。會開始放返上 FB 畀大家追返，記得去 Follow 返 IG 隨時有文睇！
IG：echoofheart
－－－－－－－－－－
《電影院門口見》
「妳想睇咩戲呀？」
「去到先揀啦！」
喺網上面相識連樣都未見過嘅兩人。相約咗喺一間電影院門口見。
男生預早咗半個鐘到達，時間、日期、地點、佢已經多次確認冇錯，但結果等咗成個鐘女生都未出現。
睇嚟……應該係俾人玩吧？
就喺佢氣沖沖咁落地鐵站想返屋企嘅時候。女生終於傳嚟訊息：
「點解你唔出現？知唔知我等咗你好耐！」
「好笑喇！惡人先告狀，明明冇出現嗰個人係妳！」
佢哋由嬲，慢慢傾到成頭問號，最後開始識驚……
「妳真係有去到戲院？」
「嗯，我見等你唔到，嬲嬲地就自己揀咗套戲睇……」
女生傳一張相過嚟，戲飛上面套戲名寫住《列車事故》。
時間、日期、地點吻合，但男生偏偏就係冇見到有呢套戲上映。
「套戲係講某架列車駛去尖沙嘴站嘅時候出軌，男主角係消防員要走去救人……」
但最後整架列車只係剩低一個少女奇蹟生還。
嘟嘟嘟嘟……講到呢度嘅時候列車正好閂門。
──下一站尖沙嘴……Next station Tsim Sha Tsui……
意識過嚟，男生即刻心知不妙……
下一刻卻天旋地轉，整個世界就好似裂開一樣。
－－－－－1️⃣－－－－－
《最幸福的一刻》
「歡迎嚟到幸福回顧社！只要戴上我哋特製嘅高科技頭套，你就可以返番去自己一生最幸福嘅時刻，親身再感受多一次！」
「吓？」
雖然將頭套戴上頭嘅時候硬係覺得怪怪地，但呢種感覺下一秒就俾期待感所取代。
到底會係邊一幕呢？
哎呀……老實講我都唔敢肯定。
係咪同初戀女友告白成功嘅時候？
定係青澀而緊張嘅第一次性經驗？
抑或係同班老同學贏到足球比賽冠軍頒獎嘅一刻？
原來，所有回憶都已經係好耐之前嘅事了。而家我只係個沉悶而一街隨處可見嘅普通人。
初戀女友幾年前同第二個人結婚了，而家已經懷緊第二胎，而我已經單身多年；
扑嘢？計起上嚟對上一次都已經四年前；
而班老同學，好多都已經移民一係就再冇聯絡……
會係幾時、係邊一幕呢？好緊張、好期待……
我合埋眼等待，直到耳邊響起一把熟悉嘅聲音：
「歡迎嚟到幸福回顧社！只要戴上我哋特製嘅高科技頭套，你就可以返番去自己一生最幸福嘅時刻，親身再感受多一次！」
「吓？」
雖然將頭套戴上頭嘅時候硬係覺得怪怪地，但呢種感覺下一秒就俾期待感所取代。
到底……？會係邊一幕呢？
－－－－－－－－－－
《性感女老師》
學校最近新請咗一位索到爆嘅女教師。每日佢都會盡情展示佢嘅黑絲長腿、恤衫亦經常性會唔小心扣少一兩粒鈕，每次彎低腰執粉筆嘅時候，都會瞬間吸引成班男同學嘅注意力。
其他女同學同女教師當然係睇佢唔順眼，但就算投訴都冇用，因為校長正好都係男人。
據說，Miss仲會暗中幫男學生「私人補習」。
雖然內容從來冇人公開過，但見補完嘅男學生第二朝都係面露春光咁返到學校，睇怕真相都係十不離九係嗰一種。
排隊等咗三個月之後，終於輪到我有機會上私人補習。呢晚，我Gel靚個頭，上到Miss屋企嘅時候，佢第一時間就叫我除衫去沖涼，話會有衫俾我換。
雖然沖嗰陣剩係得凍水，但幾凍都衝唔走我內心嘅熊熊烈火。返到出去，Miss已經喺床隔離準備好晒等我。
「你啊……睇落相當有潛力。」佢用妖艷嘅表情講。
呢晚，好漫長。
佢先幫我配個假髮、然後教我化妝同襯衫。到我意識過嚟，鏡裡面嘅我好似已經變成另一個人咁……
我內心嘅掙扎越嚟越少，佢開始教我女生嘅談吐舉止，點樣將所有男生嘅目光放到自己身上，甚至係勾引佢哋嘅方法……
「將來，『妳』肯定可以成為一個好性感嘅女教師。」
望著全身鏡，眼前係一位靚到無法用言語表述嘅少女。我下意識將纖細嘅指尖放喺紅唇前，做咗個撫媚嘅表情。
「嗯。」
－－－－－－－－－－
《壞𨋢》
「咦，壞𨋢。」
少女嘅語氣好平淡，彷彿呢件只係平常不過嘅事。下秒我哋視線有所接觸，我反射性咁撇開，佢卻主動帶起話題：
「你係啱啱收工？」
「唔係，上面有鋪頭開倉減價所以嚟望下……妳呢？」其實從佢背脊孭住嘅嘢我已經估到大概，只係禮貌咁問下。
「返Studio，我係夾Band嘅。」少女做咗個彈結他嘅手勢，然後伸手入袋左搵右搵，最後拎出一包煙同火機。
「你要唔要一枝？」佢問。
「吓？」我愕然，「喺𨋢裡面食煙會唔會唔係幾好呀？」
「唔係幾好」其實都係輕描淡寫，但少女明顯唔在意，拎出一枝然後格硬塞到我手中。
「放心喇，我食咗幾十次都冇事，而且呢部𨋢好鬼賤㗎，你係要食、要同佢鬥衰格，佢頂唔順就會自己郁得返。」
「呃……我都係一陣先去後樓梯搞掂。」
少女聽完反咗個白眼，但都冇迫我一定要喺度食咗佢。接著，佢擔著煙、點火、一吸、一呼、一氣呵成。慶幸通風系統依然運作，𨋢裡面先不至於煙霧迷漫。
「咁你最後揀唔揀到啱睇嘅衫？」少女繼續佢嘅閒聊模式。
「冇喇，好嘢已經畀人揀晒。」反正要等，我都無謂掃興。
我哋就係咁，由襯衫開始、拉到去講生活艱難、講到香港音樂、又提到朋友移民升學、兩句前仲喺度訴苦、五句後又繼續大談夢想……
我哋傾咗好耐，耐到忘記咗部𨋢原來壞咗。
耐到，發現原來壞𨋢都未必係一件壞事。
終於，消防人員嚟到，商討之後話要拉開𨋢門救我出去。
「喂，」𨋢門臨開之際，少女笑住揮揮手中嘅電話，「下次等我用專業嘅目光幫你襯衫啦。」
「好，一言為定。」
*
「先生，𨋢裡面係唔畀食煙㗎喎。」可能見我拎住枝煙，消防員伸手扶我嘅時候嚴肅咁講。
「Sorry，我只係拎住。」我即刻收埋，然後望一望旁邊。
少女呢刻已經唔喺度。
但佢點煙時嘅美態、如花火般燦爛嘅笑容、談過嘅夢、為我彈過嘅結他聲，一幕幕嘅回憶，會一直長存喺我腦海中。
我摸一摸無名指上嘅戒指，走出𨋢，繼續旅途。
－－－－－－－－－－
鍾意就記得畀個 like 同幫手分享下！記得 Follow IG 呀。
IG：echoofheart
更多足本短篇歡迎訂閱 Patreon：
https://www.patreon.com/echoofheart
Search